Jawil ngeres (hurup Arab Gundul: جاويل ڠرس; Inggris: sexual harassment) entu atu macem pengrongrongan nyang ngembètin maksud-maksud ngeres baè' danta atawa nyesep, keitung juga' ngènèng-ngènèngin bakal dikasi balesan kalu mao nutugin ser-seran nyang kaga' semenggah èn kaga' surup. Jawil ngeres mentak bisa' baé èmang cemak-cemek ngejawil paké awak atawa ngompas-ngompas bakal nglakonin abet kelamin, bikin gelagat nyang roman-romannya ngeres, ngasi unjuk gambar ngeres, atawa laèn-laèn kelakuan ngeres baè' nyang cemak-cemek kè', kata-kata kè', atawa bukan kata-kata kè'.[1] Jawil ngeres mah bentuknya bisa roncèt, mulain deri cablak ngeres ampé kèwat ngeres atawa teradung kelamin. Ni pengrongrongan mentak baé kejadian di mana-mana di masarakat kaya' di tempat gawé, ruma, sekolahan, hata di rungkun keagamaan. Pengrongrong ama korbannya bisa deri jenis apa baé.[2]